वचन बचत तथा ऋण सहकारी संस्था लिमिटेडले मिति २०८१ फागुन २९ देखि २०८१ चैत्र १ र २ गतेसम्म आयोजित अध्ययन अवलोकन भ्रमणको क्रममा २०८१ चैत्र १ गतेबाट लागू हुने गरी खल्ती नियमित बचत “खुत्रुके बचत“ खाता–२०८१ शुभारम्भ गर्यो । कार्यक्रमको प्रमुख अतिथि संस्थाका अध्यक्ष श्री मुकुन्द राज खनालज्यूले गर्नु भएको थिए । साथै, संस्थाका संचालक समितिका पदाधिकारीहरू र हाँस्य कलाकार उत्तम अर्यालज्यूको आतिथ्यतामा संस्थाका प्रमुख कार्यकारी अधिकृत डा. देशमर्दन बस्न्यातज्यूले स्वागत मन्तव्य प्रस्तुत गर्दै खल्ती नियमित बचत “खुत्रुके बचत“ खाता–२०८१ को बारेमा विस्तृत जानकारी दिनुभयो ।
कार्यक्रममा संस्थाका संचालक सदस्य र ऋण उपसमिति संयोजक श्री शान्ता गौतमज्यूले सहकारी संस्थाबाट प्रदान हुने ऋणको बारेमा जानकारी दिनुभयो । कार्यक्रमको संचालन संस्थाका सचिव श्री मनोहरी तिवारीज्यूले गर्नुभएको थियो । प्रमुख अतिथि श्री मुकुन्द राज खनालज्यूले अध्ययन अवलोकन भ्रमणमा सहभागी २८ जना सदस्यलाई सफलताको शुभकामना व्यक्त गर्दै कार्यक्रमको समापन गर्नुभयो ।
खल्ती नियमित बचत “खुत्रुके बचत“ खाता–२०८१ बालबालिका र युवाहरुलाई बचतको महत्व सिकाउनका लागि तयार गरिएको एक अभिनव पहल हो । यो खाता १६ वर्ष मुनिका बालबालिका र २५ वर्षसम्मका युवाहरूका लागि विशेष रूपमा तयार गरिएको हो, जसले भविष्यमा वित्तीय नेतृत्वको तयारी गर्न मद्दत गर्दछ र साना रकम बचत गरेर वित्तीय बानीहरूको विकासमा योगदान पुर्याउँछ ।
यस खातालाई खोल्नका लागि अभिभावक वा संरक्षकले सहकारी संस्थाको सदस्यता लिनु पर्नेछ । खाता खोल्नका लागि बालबालिकाको जन्मदर्ता प्रमाणपत्र, अभिभावक वा संरक्षकको परिचयपत्र र सहकारी संस्था सँगको सदस्यता शेयर प्रमाणपत्र आवश्यक पर्नेछ । यस खाताले साना रकम बचत गर्न सरल र सस्तो माध्यम प्रदान गर्दछ र कुनै मासिक शुल्क वा लेनदेन शुल्क छैन । साथै, ९% ब्याजदरले बचतलाई वृद्धि गर्छ र वित्तीय साक्षरता सामग्री उपलब्ध गराइन्छ ।
सदस्यको सुविधा अनुसार, ६ महिनामा वा १ वर्षमा कर्मचारीहरूले घरदैलोमा पुगेर खाता खोल्ने सेवा पनि उपलब्ध हुनेछ । डिजिटल माध्यमबाट (QR CODE) पनि बचत रकम जम्मा गर्न सकिने सुविधा प्रदान गरिएको छ । बालबालिकाको खाता अभिभावक वा संरक्षकको पूर्ण नियन्त्रणमा रहनेछ र १६ वर्ष पुगेपछि खाता वयस्कको रूपमा रूपान्तरण हुनेछ ।
यस खातामा बालबालिका र किशोर किशोरीहरूले ६ महिना भित्र १०,००० रुपैयाँ र १ वर्ष भित्र २०,००० रुपैयाँ बचत गरे बापत संस्थाको स्थापना दिवसमा नगद पुरस्कार प्राप्त गर्नेछन् । खाता सम्बन्धी कुनै पनि जिज्ञासा वा सहायता प्राप्त गर्नका लागि सदस्य सेवा कर्मचारी वा सहायता कक्षा सँग सम्पर्क गर्न सकिने छ ।
यस पहल मार्फत, वचन बचत तथा ऋण सहकारी संस्था लिमिटेडले आगामी पुस्तालाई वित्तीय व्यवस्थापनको महत्व बुझाउने र उनीहरूलाई वित्तीय अभिरुचिको विकास गर्ने लक्ष्य लिएको छ ।
(राष्ट्रिय सहकारी बैंक लि.को “शाखा उत्कृष्ट पुरस्कार २०८०÷०८१” प्राप्त गर्न सफल )
